Ayisafunwa muntu inkosi kaSihle Zikalala ne-IFP eMsinga

Ngu-Aya Ngubane

Ngomhlaka-27 December 2016 amaBomvu aba nomhlangano eNhlonga ngodaba lwenkosi uPano Ngubane lapho zonke izigodi zesizwe ezili-15 zazimelwe zithunywa zazo. ezaseMsinga Newspaper zazimenyiwe kulo mhlangano. AmaBomvu ayixosha esikhundleni zingama-27 Disemba 2016, yaphinda yehliswa esikhundleni nayiKhomishana kaNhlapho ngonyaka ofanayo...

                                      UMntwana uPano Ngubane

Nazi izigodi zamaBomvu nokumeleleka kwazo yizinduna nezithunywa zazo kulowamhlangano wokuxoshwa kweNkosi uPano:

• Nqabeni – 05 - izithunywa (delegates)
• Hholwane – 06 - izithunywa (delegates)
• Ngubevu – 0 - izithunywa (delegates)
• uThame – 3 - izithunywa (delegates)
• Gxobanyawo – 01 - izithunywa (delegates)
• Mbhono – 02 - - izithunywa (delegates)
• Nhlesi – 0 - - izithunywa (delegates)
• Mkhuphula – 0 - izithunywa (delegates)
• Ndaya – 3 - izithunywa (delegates)
• Nhlonga – 11 - izithunywa (delegates)
• Latha-Ntshawu – 0 - izithunywa (delegates)
• Phakwe – 07 - izithunywa (delegates)
• Nzala – 03 - izithunywa (delegates)
• Nqola – 02 - izithunywa (delegates)
• Dolo – 19 - izithunywa (delegates)
• Latha-Mbonja – 01 - izithunywa (delegates)

Umhlangano uyavulwa uSihlalo wawo uMntwana uKhetheyakhe Ngubane owavula ngokubonga ithuba lokuba khona komhlangano.

UMntwana uKhetheyakhe Ngubane uthi:

“Bekulokhu kubhungwa ukuthi umhlangano ubanjwe nini ngoba kukhona uMsinga osekhaya noMsinga osemadilobheni ngokomsebenzi. Lokhu sasikushiso ukuthi sasithunywe yisizwe njengesigungu saseNdlunkulu ukuthi sike siphenye ngalezi zinkinga ezithinta ubukhosi besizwe samaBomvu aseMsinga.

                                      KwaMbhono

“Sagcina sihleli kwaMbhono, saphinda sahlala futhi nakwezinye izindawo ezahlukahlukene ngalolu daba. Kwagcina umphumela ungekho ngoba izikhalo zesizwe zagcina zedluliselwe emnyangweni wakwaCogta.

“Umnyango wasitshela ukuthi uyaqonda ngezinkinga zobuKhosi bamaBomvu aseMsinga futhi sezicutshunguliwe, wathi zikhona izinyathelo ozozithathela inkosi ephethe ngezinxushunxushu esezibikiwe ukuthi zidaleke ngaphansi kokubusa kwayo.

“Sibuke sabuka isimo njengesiGungu sanquma ukuthi sinibize njengesizwe sinibikele ukuthi kuqhubekani ngomsebenzi wethu. Esethemba ukuthi nesiGungu esiseGoli sizosibikela namhlanje ukuthi sekuhanjwe kwafikwaphi. Bekuyileyo-ke inhlosongqangi yalo mhlangano wanamhlanje, osekugcine kuvela neminye imixhantela ngaphambi kokuthi singene la ehholweni ngezinye izinkinga ezikhona; njengodaba lakwaDolo nje.

“Nginethemba lokuthi njengoba sihlangene nje sizophuma nezixazululo ngalolu daba kunamhlanje. Ngicela siqoqe ulimi uma sikhuluma, kungalumeli kumuntu osemhlanganweni. Ngiyabonga.”

Imibiko yaseGoli ithulwa nguMntwana uZamokwakhe Ngubane omele isizwe samaBomvu eGoli:

Uvula ngokubonga abaphumelele ukuza emhlanganweni...

“Emhlanganweni wangomhlaka-27 September 2013 kwavela ukuthi asoke sihlanganise amakhanda ngalolu daba lokudunguzela kobukhosi nezinkinga ezihaqe isizwe samaBomvu aseMsinga.

“Njengoba siseGoli nje sithwele ubunzima obukhulu. Singezwa okunye noma nini. Kunabantu bakithi abayisithupha asebesishiyile emhlabeni sikhuluma nje.

“UDumakude waseNhlesi owuSayitsheni okungakaziwa ukuthi udutshulwe ngubani. UDlamini wakwaLatha-Ntshawu osesimweni esibucayi nodutshulwe ezinsukwini nje kumanje akakhulumi. UPhungula ongcatshwe namhlanje eMkhuphula. OwaseHholwane. OwaseNqabeni odutshuliwe naye ongasekho emhlabeni. NowaseNzala kwaChonco odutshulwe ekuqaleni kwalenyanga.

“Sizocela isu lokuphuma kulesi simo esibhekene naso MaBomvu. UBhuti lo osesihlalweni sobukhosi akakangemukeli namanje. Namanje ngilana nje yingoba ngize ngemukelwa abanye abaNtwana baseNdlunkulu. Inkinga anginaye umuntu engingabika kuye ngoba sengifana nomuntu ongenababa.

“Kuthiwa ukusuka eNhlonga kuya kwaDolo le ngxenye yamaBomvu isingaMakhabela. Kumele omunye nomunye abe nezwi kulento. Njengomuntu oyinduna nobekwe yisigodi kumele ubekhona emihlanganwebni yesizwe ngoba awubekiwe yinkosi kodwa ubekwe yisigodi. Ngiyabonga.”

USomlomo wethimba eliseGoli uMnu Gugu Mkhize uthi:

Ubingelela umhlangano nezithunywa…

“Ngabe uNdabezitha umelelekile yini emhlanganweni?”

Kuvela ukuthi akamelelekile.

“Kuyadabukisa ukuthi kunabantu abadala abasakhonze ukudlala njengalaba abangaphumelelanga emhlanganweni yize kade bemenyiwe. Ngithi angibike ukuthi thina njengoBumbano loMsinga sixazulule inkinga yokubangwa kwemingcele esigodini saseNqabeni. Angibike futhi ukuthi kulahleke umuntu wakwaThusini ogcine etholakele kodwa kwaphawuleka ukuthi kukhona isandla esibi esinecala kulokhu.

“Ngicela siyeke ukuklwebhana sodwa siyisizwe samaBomvu. Lokhu kokwetha isizwe samaBomvu ngaMakhabela yilumbo uqobo lwalo. MaBomvu; sesibekezelela nento nje engabekezeleleki. Sicela umuntu omele isiGungu azi ukuthi kungumsebenzi wakhe ukubikela sonke isizwe samaBomvu ngokuqhubekayo, hhayi ukuthi udaba luphelele esigodini asakhele nje kuphela.

“Nali ithimba lethu:

• UThusini waseNqabeni
• UNgubane waseHholwane  
• UMalinga wakwaMbhono
• ULuvuno waseNgubevu
• UMvelase wakwaNdaya
• UNdlovu wakwaDolo
• UKhumalo waseNhlonga
• USithole wakwaPhakwe
•  UZuma waseNhlesi
• UNgubane wasoThame

“Siqikelele uma sikhuluma ngoba amazwi ethu ayasilandela. Ngiyabonga.”

Ukumiswa kweNkosi uPano ngomhlaka-27 December 2016

UMntwana uMzokhanyayo Ngubane:

Ubingelela umhlangano...

“Sekuyiwe nakuNgqongqoshe wakwaCogta. Sambikela noMengameli wezwe uMnu Jacob Zuma emhlanganweni owawuseThekwini wokubuyisana nabakwaNxamalala ukuthi inkosi yaseMabomvini aseMsinga sesiyimisile.

“Sithole umbiko ukuthi uNgqongqoshe uNomsa Dube-Ncube waqasha abammeli bakwaLuthuli-Sithole ukuthi bacubungule udaba lwayo, abathola ukuthi inkosi inamacala okumele iziphendulele ngawo. Namanje kusalindwe i-charge sheet okwakulindeleke ukuthi kubekwe ngayo inkosi amacala, engakafiki namanje ukuvela eMnyangweni wakwaCogta. Sabatshela thina abakwaCogta ukuthi kumanje ayikho inkosi ebusayo eMabomvini.

“Ukumiswa kwakhe umfowethu kumayelana nako ukungasebenzisani kahle kwakhe nesizwe ngoba uma uyobika kwankosi ufokofiswa wunkosikazi wakhe. Sekuthiwa amaBomvu yisizwe esiphethwe wumfazi. Ngiyabonga.”

Induna yakwaDolo uMthizima ibika ngezinkinga zakwaDolo:

“Sibanga indawo engamahlathi esetshenziswa abantu baseMakhabeleni. Lolu daba seluze lwafinyelela kuMasipala waseMvoti. AbaseMakhabeleni bathi izwe labo lisuka eNhlonga liyovala ngoDolo.

“Kugcine kunomuzi osewakha la kusetshenzelwa khona. Sababuza abaseMakhabeleni ngalomuzi, bathi abawazi. Savumelana ukuthi awusuke lowomuzi endaweni.”

UNgubane wakwaDolo uyafakaza ngalolu daba:

“Phakathi kwezinkulumo ezike zabakhona phakathi kwenkosi yaseMabomvini nenkosi yaseMakhabeleni athi amakhosi azobuya kithi ukuzobika ngombango walamahlathi ashiywe wumlungu engasachazanga naye ukuthi lomhlaba wayewuthathe kobani..."

[Side Note: Ngokuthola kwesazeMsinga Newspaper ngombango walamahlathi, kuthiwa kukhona izikhulu zikaHulumeni esiFundazweni sakwaZulu-Natal ezinezinhloso zokuxhamula nazo kulamahlathi ashiywe yilomlungu, okubalulekile kuzona ukuthi inkosi ephethe amaBomvu kube yinkosi ezolawulwa yibo neqondayo ukuthi ukuphalala kwegazi lomuntu omnyama ngenxa yombango walamahlathi akusho lutho kubona ngoba into ebabulekile yinzuzo abazoyenza qha.

Ngokomthombo wethu othembekile, lo mkhuba udla lubi laphaya eMnyangweni wakwa-Land Affairs eKZN, eMhlaba House, la abelungu behlangene nezisebenzi ezithile zakhona, ikakhulukazi lezi ezaziqashwe wuHulumeni weNkatha isaphethe iProvince, la kwakhiwa khona izihenqo zokuhambisa kancane lolu hlelo lokubuyiswa kwemihlaba yabantu ukuze amaBhunu awuntshontsha kubo angagcini nje ngokuthola imali yokuwudayisela uhulumeni owuthengela abanikazi bawo, kodwa kwenziwe namasu okuthi laba bantu abamnyama asebengena kuwo behluleke ukuwusebenzisela inzuzo ngokuyimpumelelo. 

Ukuze bona kanye futhi laba belungu abaphumayo nasebekhokhelwe wuHulumweni ukuwubuyisela kubanikazi bawo baphinde bawuthathe futhi sebewucosha phansi ngenxa yezinkinga mhlawumbe zemibango edalwa ngabomu njengawo lo wamaKhabela namaBomvu. 

Lo mlungu ushiye lo mhlaba usembangweni ngabomu ngoba wazi kahle ukuthi wayewuntshontshe kusiphi isizwe kodwa angeke akuchaze lokho ngoba kuzodala isixazululo kanti yena uziphilisa ngezinxushunxushu zabantu abamnyama. Kumanje ubhobhile nje layebhobhe khona ufeleba ukuze ngokuhamba kwesikhathi uma singaveli isixazululo aphinde futhi abuyele kulowa mhlaba osembangweni ongapheli awuthathe ngosizo lwezichuse zakhe kwaHulumeni. 

Yingakho nje kungenasixazululo esivela kwaLand Affairs ngombango walo mhlaba osubangwa amaKhabela namaBomvu, yingoba mlungu ndini uyazi ukuthi lezi zikhulu zikaHulumeni ziyakulekelela ukuze ngokuhamba kwesikhathi ubuyele kulowamhlaba osukhokhelwe ngawo “ngoba abantu abamnyama bayahluleka ukuwusebenzisa.” 

Bese kuthiwa abantu abamnyama, njengaseZimbabwe nje, abakwazi ukuziphilisa ngomhlaba uma engekho umlungu kanti izinkinga zabo zakhiwa ngabomu yibo kanye abelungu abangamasela behlangene nezikhohlakali zosopolitiki abangabantu abamnyama ezibakhonze kuhle konkulunkulu basemhlabeni.

Bakhutshekiswa kanje abanikazi abasha bomhlaba abangabantu abamnyama ebe lomlungu oyisela engakhokheliwe nje imali yokubuyisela umhlaba kubanikazi  bawo kuphela, kukhona nenye imali  ayitholile yokuqeqesha abanikazi abasha bomhlaba ngokusetshenziswa kwawo uma befisa ukuwusebenzisela ukukhiqiza nenzuzo. Yingakho kubalulekile kulabogalajana ukuthi inkosi ephethe emaBomvini kube ngeyangena ngewindi ukuze kube lula ukuyilawula.

Asuke umlungu alugodle ngabomu ulwazi olubalulekile ngokusetshenziswa ngendlela yokukhiqiza komhlaba awushiyayo ukuze abantu behluleke, badikibale, mhlawumbe bagcine bewushiye kanjalo kanti ukwehluleka kwabo yinto yokwakhiwa.  

Yingakho nje sithi lento yokwabiwa komhlaba ngalendlela yokuwusebenzisela ukukhiqiza iwukudala uchuku olungenasidingo emiphakathini nokwenza abantu abamnyama bahluleke ngoba ukukhiqiza kudinga utshale ngokwesayensi uphinde ukhiqize nezilwane ngokwesayensi futhi, okuwumkhuba owafika nabelungu. Kanti kulula ukutshala nokufuya  uma ungazujova izilwane usebenzise nembewu mbumbulu yabelungu (genetically modified seeds) yezitshalo ezibanga izifo.

Abantu abanikwe umhlaba owantshontshwa kubo hhayi ngenhloso yokuxova nokubaxabanisa bodwa ukuze babulalane bodwa; abasikelwe ama-plot ukuze balimele ukondla imizi yabo, hhayi ukukhiqizela amasuphamakethe nala mavila angafuni ukusebenza umhlaba, okuyifa uMdali awanika lona ukuze baziphilise. 

Ezweni eselikhululeke ngempela kumele kube yicala elibomvu ukuthenga nokudayisa ukudla ukuze wonke umuntu adle izithuthuku zakhe ngokuzilimela umhlaba afuye. Abantu okumele bondliwe yizibonelelo zikahulumeni yilabo abakhubazekile nasebegugile kuphela.]

“...Sikhuluma nje sekufike abanye abantu bazosebenza kuhle kwabelungu kuleyandawo ebiyaziwa njengendawo yakwaJeke eMabomvini. Bayagawula. Sekuze kwaboshwa nabathile. Ngokubulawa kwalomfana okuthiwa yiBhunu eMakhabeleni, asikucacise nje ukuthi kungamampunge ukuthi kukhona abathintekayo kwaDolo.

UMntungwa osephuma njengoMdidiyeli wamaButho (Commander-in-Chief) aseMabomvini uyaphawula: 

Ubingelela umhlangano…

“Izinduna nobhekeni bayesatshiswa ngokuya emihlanganweni yinkosi. Alikho yini iqhinga lokuchitha le nkosi ngoba seyehlulekile ukubusa isizwe. Kusabambeni njengoba senishilo ukuthi noMnyango weZokubusa uyithole inamacala.

“Kuzoze kube nini MaBomvu nibuswa wumuntu eningasamfuni. Kungani ningamtsheli ukuthi akehle esikhundleni? Izinduna aziyeke ukungcetheza. Zikhethwe yisizwe, hhayi inkosi.

UMnu Masithela Sithole – owayeyinduna yakwaDolo:

“Nisibona silapha nje siqhathwa amasela omhlaba angabelungu. Mina ngikhule ekhona amaKhabela akhelene noDolo futhi kungenamsindo phakathi kwethu.

“Ngeshwa kwavela isigodi sakithi kwaDolo sathi angiphathe njengenduna. Sangibeka njengenduna ngingekho. Ngavuma. Kuthe kusuka kwaboshwa izinkomo zami ziboshwa yiBhunu lepulazi. Kwanginenga lokhu. Ngaya kulona ngathola izingane ezisebenza khona ngabuza ngokuboshwa kwezinkomo zami.

“Umlungu wathi angikhokhe inhlawulo ngoba izinkomo zami zidle enkanjini yakhe. Sathathana kwashunqa uthuli. Ngithe ngisuka ngaqaqa ucingo ngenhloso yokuzikhipha esikiti, ngithe ngibona amantombazana amsebenzelayo lo mlungu ayevula isango. Ngazikhipha. Kodwa wangisongela wathi siyohlangana enkantolo.

“Ngithe ngizwa kwakuqhuma isibhamu enhla komuzi wami. Sathola ukuthi kudutshulwa izimbongolo zami. Ngike ngambhobhela ndawana thile lo mlungu ngenhlanhla yakhe waphunyula. Ngaqonda emaphoyiseni ngayobika. Enkantolo ngafuna izincwadi zokuthi walithenga kubani izwe ngoba elakwaNgubane.

“Ngatshela imantshi ukuthi ngizozimbula umuzi wami ngiwugxumeke epulazini lakhe. Wathutha umlungu wansondo. Kuthe kusuka kwafika abantu baseMakhabeleni bathi bathunywe wumlungu ukuthi bazoqaqa ucingo ayelushiyile. Emveni kwalokho ngajikelwa yibo kanye abantu bakwaDolo bangikhipha ebunduneni.”

UNgubane oyisemenywa uyaphawula:

“Umbono wami ngoba kuyacaca ukuthi inkosi isisidayisile ukuthi akuqokwe umeluleki wesizwe samaBomvu ozosiphathela izikhiye ngezinkinga esibhekene nazo njengalezi ezithinta amaKhabela nje.”

UMchunu oyisemenywa uyaphawula:

"Inkosi ayivulelwe icala ngokuqhatha amaKhabela namaBomvu. Umbono wokuya ehlathini uzojabulisa bona kanye labo xovizwe abathokoziswa ukuphalala kwegazi labantu."

UDlamini induna yaseNqoleni:

“Sabamisa nathi abasemaKhabeleni ukuthi bangakhi laphaya. UNdabezitha (inkosi) usihamba ngemuva uma eyokhuluma nabo. Akakaze asimeme njengezinduna ukukhuluma udaba lwasemaKhabeleni. Sesatshiswa kwathiwa singalubhadi kwanhlobo lapho. Angikubeke kucace nje ukuthi yiyo kanye inkosi esihlukanise isigodi sakithi eNqoleni phakathi.”

UFuneka ngecala analo nenkosi uPano:

“Kwaba nombango mayelana nezinkomo emndenini, enye yezinkomo yagcina isisiswe enkosini ukuze uma kuvela isixazululo ngodaba lwayo ibuye. Sesifinyelele esixazululweni ngalolu daba, manje inkinga sekuwukuthi leyo nkomo yakithi ayisatholakali, uma ibuzwa inkosi ukuthi iphi inkomo ithi yaphoseka esiweni eHholwane, kodwa namanje ubufakazi besikhumba sayo abuveli.

“MaBomvu, anginazise ukuthi inkosi isihlangene nezinduna ezithile edlelana nazo ukuthi ngenzakaliswe ngenxa nje yodaba lwezinkomo zakithi. Ngiphakamisa ukuthi okungcono akukhethwe uNdunankulu wesizwe samaBomvu ongeyena owakwaNgubane ngesibongo okwesikhashana ukuze kube nguye esizobika kuye okwamanje.

Mbawa oyisemenywa uyaphawula:  

“Inkosi isonga ithi noma ingafa isizwe samaBomvu siyosala nokubhujiswa.”

UNgubane oyisemenywa uyaphawula:  

“Sesiyaqonda ukuthi inkosi okumele ithathe isiyaziwa yiNdlunkulu ngakho-ke ayikhethwe kwamanje.”

Kukhethwa uMnu Reuben Shelembe waseNzala njengoNdunankulu wesizwe samaBomvu. Kunqunywa ukuthi inkosi uPano ayiseyona inkosi yamaBomvu, kwaziswa zonke izinduna ukuthi sekumele zibike kuNdunankulu uShelembe.

Kuthathwa isinqumo sokuthi akulindelwe umphumela wesinqumo seKhomishana kaNhlapho ebeyihleli eBathenjini ngonyaka ofile ngobukhosi bamaBomvu aseMsinga ngenkosi okumele ithathe emuva kukaPano.

Sekuvelile ukuthi isinqumo seKhomishana kaNhlapho sesineminyaka emihlanu yonke saphuma ngowezi-2015, kodwa iHhovisi likaNdunankulu obesekunguMnu Willis Mchunu, ngaleso sikhathi kuhlala lo mhlangano ngonyaka olandelayo yilona ebelilokhu lihlezi phezu kwesinqumo esingujuqu. IKhomishana ihlonze ukuthi ubukhosi abubuyele endlini kaNkosikazi  yenkosi uMayizikanye uLoyi Ncwane uMaSibabane, buthathwe yindodana yakhe uMntwana uSenzani Ngubane eyayiqolwe bona yiqembu le-IFP ngowezi-2004.

Kodwa kuze kube yinamhlanje uHulumeni wesiFundazwe sakwaZulu-Natal, kusukela kusaphethe uNdunankulu uMnu Senzo Mchunu kuya kuMnu Willis Mchunu kuze kufike kuMnu Sihle Zikalala, usagcine ubukhosi bamaBomvu ngokungekho emthethweni kuMntwana uPano Ngubane.